نئے مالی سال 2026-27 کے بجٹ میں حکومت نے انکم ٹیکس اور سیلز ٹیکس میں دی جانے والی مختلف چھوٹ میں کمی کا فیصلہ کر لیا ہے، جس سے جی ڈی پی کے تقریباً 0.15 فیصد کے برابر اضافی آمدن حاصل ہونے کی توقع ہے۔
بجٹ دستاویزات کے مطابق فیڈرل بورڈ آف ریونیو کے اصلاحاتی منصوبے پر عملدرآمد کے ذریعے بھی مزید 0.15 فیصد اضافی ریونیو اکٹھا کرنے کا ہدف مقرر کیا گیا ہے، جبکہ دسمبر 2026 تک فیڈرل بورڈ آف ریونیو کی مجموعی اضافی آمدن 7022 ارب روپے تک پہنچنے کا امکان ہے۔
حکومت نے بین الاقوامی مالیاتی فنڈ کو یقین دہانی کرائی ہے کہ اگر حکومتی آمدن میں کمی ہوئی تو اضافی ٹیکس اقدامات کیے جائیں گے۔ نئے بجٹ میں مستقل نوعیت کی ٹیکس پالیسیوں اور ٹیکس وصولی کے نظام کو بہتر بنانے کے لیے مختلف اصلاحات بھی شامل کی جائیں گی، جن سے جی ڈی پی کے 0.3 فیصد کے برابر مزید آمدن متوقع ہے۔
دستاویزات میں یہ بھی بتایا گیا ہے کہ بین الاقوامی مالیاتی فنڈ کی سابقہ سفارشات کی روشنی میں اضافی اقدامات تجویز کیے گئے ہیں، جبکہ فیڈرل بورڈ آف ریونیو کے ریونیو اہداف بھی ٹیکس وصولی میں مزید اضافے کو مدنظر رکھتے ہوئے مقرر کیے گئے ہیں۔
